Feronikeli ka shënuar fitoren e parë në këtë edicion të Superligës, duke ia shkaktuar humbjen e parë Rahovecit.

Takimi që u zhvillua në palestrën “Mizahir Isma” për shkak se palestra në Drenas është duke u rinovuar përfundoi me fitoren e Feronikelit me rezultat 75:72 (19:18, 23:18, 10:24, 24:14).

Ndeshja ishte shumë interesante dhe dramatike deri në sekondat e fundit të përballjes. Çereku i parë ishte shumë i barabartë me skuadrën nga Drenasi që e fitoi 19:18, derisa më bindës ishte në atë të dytë 23:18.

Megjithatë, Rahoveci u këndell në periodën e tretë që e fiton 24:10, por në çerekun e fundit ndodhi drama. Feronikeli afron rezultatin në 68:69, derisa më pas barazon shifrat në 71:71.

Jure Gunjina shënoi njërën nga dy gjuajtjet e lira, kurse më pas Tyron Garland shënoi dy pikësh për 73:72, derisa më pas amerikani shënoi edhe dy pikë të radhës për 75:72 në fitoren e parë të Feronikelit.

Garland ishte hero duke shënuar nëntë pikët e fundit për skuadrën e Feronikelit, që arriti fitoren e parë pas katër humbjeve, derisa ishte humbja e parë e Rahovecit pas tri fitoreve.

Garland shënoi 26 pikë, katër kërcime dhe tetë asistime për Feronikelin, derisa u ndimua edhe nga kapiteni Arti Hajdari me 20 pikë dhe Darius Huggins me 12 pikë e 16 kërcime.

Te Rahoveci pikë dyfshirore shënuan Christian Bradford 17, Jure Gunjina 16 pikë, 11 kërcime, 6 asistime dhe Justin Gray 15 pikë, 6 kërcime e 4 asistime.