Trajneri i Feronikelit, Zekirija Ramadani, ka folur pas fitores 0-4 në Prizren, ndaj Lirisë.

Ramadani tha se klubi ynë, në çdo ndeshje futet për fitore dhe se Feronikeli nuk varet nga askush tjetër, përveç vetvetës.

“Si lider në tabelë që jemi dhe pretendentë për ta fituar titullin ne në çdo ndeshje futemi për fitore. Ashtu ishte edhe ndaj Lirisë, e cila kishte gjithashtu presionin e pikëve pasi që gjendet në një pozitë të vështirë për tu larguar nga elita”

“Kjo bëri që ndoshta minutat e para të ndeshjes të ishin të baraspeshuar, por me realizimin e dy golave të shpejtë gjërat erdhën në vendin e vetë, pasi që ekipi fitoi qetësinë e duhur”.

“Në shikim të parë mund të duket një ndeshje e lehtë në bazë të rezultatit, por nuk ishte ashtu, pasi që Liria na luftoi dhe na vuri disa herë në situata të vështira. Në fund ishin të rëndësishme pikët dhe ne duhet të vazhdojmë me këtë ritëm”.

“Varemi nga vetja jonë. Jemi lider në tabelë dhe nuk varemi nga askush. Numri i ndeshjeve po zvogëlohet dhe ne duhet të vazhdojmë në këtë mënyrë deri në fund për të arritur deri te titulli kampion”, tha Ramadani për Super Sport Kosova.

8 Prill, 2019